Rapunzel
Age: 124
Total Posts: 51848
Points: 0
Location:
Pakistan, Pakistan
Iqraar-e-vafaa, ummeed-e-karam! kuch keh na sake, kuch bhool gae!
vaade wo teyre mubham, mubham! kuch keh na sake, kuch bhool gae!
sarshaary ulfat ka aalam! kuch keh na sake, kuch bhool gae
jazbaat ki wo dheemi sargam! kuch keh na sake, kuch bhool gae!
aalaam kee wo yoorish peham! kuch keh na sake, kuch bhool gae!
doobi huwi nabzon ka aalam, kuch keh na sake, kuch bhool gae!
yaadon ki khalish wo shaam-o-sahar, maayoos sy wo deevaar-o-dar
ehsaas ki lau maddham, maddham! kuch keh na sake, kuch bhool gae!
kya weham-o-gumaan, kya ilm-o-yaqee'n, kya fikr-o-gham-e-dunyaa-o-deen
hasti kay wo saare pech-o-kham, kuch keh na sake, kuch bhool gae!
wo shehar-e-mujassam jaan-e-sukhan, har saans mein yoon hai naghmah-zan
afsaanah-e-gham, roodaad-e-alam, kuch keh na sake, kuch bhool gae!
kab daur-e-khizaan aayaa aur kab rukhsat wo gul-e-ranaa,ee huwaa
mehroomi-e-jaan, majboori-e-gham! kuch keh na sake, kuch bhool gae!
dil aise puraane paapee ko kya kaam hai deen-o-eema'n se?
wo saaz-e-kaleesa, soz-e-haram, kuch keh na sake, kuch bhool gae!
hasti kay fasaane khuwaab huwe, daryaa-e-junoon paayaab huwe
aansoo aksar, hansnaa kam kam! kuch keh na sake, kuch bhool gae!
unwaan ye hi thehra sarwar afsaanah-e-hastee ka teray
yaa qalb-e-hazeen yaa deedah-e-nam, kuch keh na sake, kuch bhool gae!
