~ MUNTAZIR ~

DEDICATED TO MY BEST FRIEND, TO WHOM I LOVE ALOT !!!

janay walay tum ne kaha tha ke jub phoolon se mehkaar rukhsat honay lagay , jub chaand roshni khonay lagay , jub aankhon se moti girnay lagein , jub sitaray sonay lagein , jub dil ki dharkanein ruknay lagein , jub bahar roothnay lagay, jub sawan bin bersay guzernay lagay , jub honton ki muskaan pheeki pernay lagay , jub naghmon ki lay tootnay lagay , aur jub chiraghon ki zia maand pernay lagay , to mein laut aaon gi ..............

laut aao ke aankhon mein tumhari yaadon ke deep jal uthay hein , tumhari raahon mein palkein bichi hoi hein ,tumharay intezar mein aankhein sawan ki terha baras rahi hein , tumharay bina kitnay taptay howey din ,kitni taweel raatein aur kitnay mausam beet chukay hein . her na-umeedi ke perday mein uroos-e umeed lipti hoi hai , her khizaan ke seenay mein bahar ka dil dharakta hai ........

laut aao ke tumharay bina yeh zindagi eik dukh eik karb eik pachtawa sa bun gai hai , kaash tum mere iss karb ko mehsoos ker sakteen , ke tumhari yaadon ne mujhay kitna tanha ker diya hai , magar phir bhi mujhay tumhara intezar hai ,k umeed zindagi ka sahara hai .........

ab laut aao ke mein aankhon mein zindagi ki tamam ter thakan ke saath tumhara intezar ker raha hoon aur tumharay qadmon ki ahat ka MUNTAZIR hoon ............................


ROHAIL