Ye Jawan Saal
Ghar Se Nikaltay Nahin
Sarhado'n Ke Nigehbaan Abb Kursion Ke Talabgaar Hain
Apne Aaqa Ke Darbaar Main
Jumbish-e-Chamshm-o-Abru Ke Paiham Talawat Main Masroof Hain
Sir'khameeda Hain
Shaanay Bhi Aagay Ko Niklay Huay
Bus Nisab-e-Tamalluq Ki Takmeel Main Munhamik!
Mera Dil Ro Para
Ay Khuda!
Meray Pyaray Watan Pe Ye Kesi Ghari Hai
Tarashay Huay Jism
Aasa'ishon Main Paray
Apni Rana'ian Kho Rahay Hain
Zehen Ki Saari Yak'sui Maftood Hai
Ehl-e-Tibl-o-Alam
Ehl-e-Jah-o-Hasham Ban Rahay Hain
Aur Iss Baat Per
Dekhti Hoon Ke Maghroor Hain!
Ay Khuda!
Meray Pyaray Sipahi Ko Sarhad Ka Rasta Dikha
Ishq-e-Amwaal-o-Hub-e-Manasib Se Bahar Nikal
Iss Ke Hathon Main
Bhooli Hui Taigh Phir Se Thama!
