Kabhi Iqraar Kar Lena Kabhi Inqaar Kar Lena
Kahan Se Tumne Seekha Hai Anokha Pyar Kar Lena


Tumhain Banhon Mein Bhar Ke Sirf Yeh Pegham Dena Tha
Apne Soye Jazbon Ko Zara Baydar Kar Lena


Kabhi Chahat Say Tum Maghloob Ho Kar Muskura Dena
Kabhi Kuch Sochna Aur Soch Kar Inqaar Kar Lena


Kabhi Shola Kabhi Shabnam, Kabhi Shadaan Kabhi Barham
Kabhi Rona Kabhi Lehjay Ko Phir Jhankar Kar Lena


Tumhari Bolti Ankhain Yeh Gurr Bhi Janti Hon Gi
Hum Aison Ko Aseer-e-Naghma-e-Guftaar Kar Lena


Salika Chahiye Raah-e-Talab Main Jeenay Marnay Ka
Nahin Zeba Mohabbat Ko Janoon Asaar Kar Lena


Mohabbat Aik Naimat Hai Isay Sahar Yeh Samjho Na
Munasib To Nahin Hoga Isay Aazaar Kar Lena