Humari Urdu!

Kaabe kii hai havas kabhii kuu-e-butaan kii hai ,
mujh ko Khabar nahii merii miTTii kahaa kii hai!!

[kuu-e-butaan=beloved’s street>

Kuchh taazagii ho lazzat-e-aazaar ke liye ,
har dam mujhe talaash naye aasamaan kii hai!!

[lazzat-e-aazar=flavour of pain; thrill of pain>

Hasarat baras rahii hai mere mazaar se ,
kehte hai sab ye qabr kisii naujavaan kii hai!!

Qaasid kii guftaguu se tasallii ho kis tarah,
chhipatii nahii vo jo terii zabaan kii hai !!

Sun kar meraa fasaanaa-e-Gam us ne ye kahaa,
ho jaaye jhuuT sach, yahii Khuubii bayaan kii hai!!

Kyuun kar na aa_e Khuld se aadam zamiin par,
mauzuuN vahii vo Khuub hai, jo shay jahaaN kii hai!!

[Khuld=paradise; mauzuuN=fit, well balanced>

URDU hai jisakaa naam hamii jaanate hai ‘Daag’ ,
hindustaan mein dhuum hamaarii zabaaN kii hai

Posted on 11/27/2004 10:01:23 PM

hudz9

Rasm-e-ulfat sikhaa gayaa koii,
dil kii duniyaa pe chhaa gayaa koii!!

Taa qayaamat kisii tarah na bujhe,
aag aisii lagaa gayaa koii!!

Dil kii duniyaa ujaar sii kyuun hai,
kyaa yahaa se chalaa gayaa koii!!

Waqt-e-ruKhsat gale lagaa kar "Daag",
haste hasate rulaa gayaa koii!!

Posted on 11/27/2004 10:06:08 PM

hudz9

muhabbat karane vaale kam na honge
terii mahafil mein lekin ham na honge

zamaane bhar ke Gam yaa ek teraa Gam
ye Gam hogaa to kitne Gam na honge

dilon kii uljhane barhatii rahengii
agar kuchh mashvare baaham na honge

agar tuu itefaaqan mil bhii jaaye
terii furqat ke sadame kam na honge

Posted on 11/27/2004 10:15:40 PM

paki_fan