¤ rokta hai...... ¤

rokta hai gham e izhaar se pindaar mujhe
mere ashkon se chupa le mere rukhsar mujhe

dekh ae dasht e junoon bhed na khulne paae
dhoondne aae hein ghar k dar o deevar mujhe

si diye hont ussi shaks ki majboori ne
jiss ki qurbat ne kiya mehram e asraar mujhe

jins e veerani e sahaara meri dokaan mein hai
kya khareede ga tere shehr ka bazaar mujhe

jaras e gul ne kaee baar bulayaa lekin
le gaee raah se zanjeer ki jhankaar mujhe

navak e zulm utha, dashna e andoh sambhal
lutf k khanjar e benaam se mat maar mujhe

saari dunya mein ghani raat ka sannata tha
sehn e zindaan mei mile subha k asraar mujhe

Mustafa Zaidi

Posted on 2/19/2006 3:30:57 PM