Agarcha main chatan sa admee raha hoon
Magar teray baad hosla hai ke jee raha hoon

Wo raiza raiza meray badan main utar raha hai
Main qatra qatra us ki ankhon ko pee raha hoon

Teri hathaili pe kis nay likha hai qatal mera
Mujay too lagta hai main tera dost bhi raha hoon

KHulli hain ankhain magar badan hai tumam pathar
Koi batay ke main mar chuka hoon ke jee raha hoon

Na poochh muj se ke shehr waloon ka haal kia tha
Main too khud apnay ghar main doo gharee raha hoon

Mila too beetay dinoon ka sach us ki ankh main tha
Wo ashna jis se mudatoon ajnabi raha hoon

Bhula de muj ko ke be-wafai baja hai laiken
Gunwa na muj ko ke main teri zindagee raha hoon

Wo ajnabi ban ke abb milay bhi too kia hai MOHSIN
Yeh naaz kam hai ke main bhi us ka kabhi raha hoon